АТЫРАУ. ҚазАқпарат – Елімізде бастау алған «Киелі табиғат» экологиялық жобасын атыраулық оқушылар да қолдады. Олар аталған жоба аясында саябаққа жеміс ағаштарының көшетін екті, деп хабарлайды ҚазАқпарат.
Атырау облыстық «Жас Ұлан» бірыңғай балалар мен жасөспірім ұйымының атқарушы директоры Айымгүл Қосалиеваның айтуынша, акцияға жас белсенділер мен Қазақстан халқы Ассамблеясы «Жаңғыру жолы» жастар қозғалысының волонтерлары қатысқан.
«Бұл жоба бірнеше мақсатты көздейді. Біріншіден, жас буынның табиғатқа жанашырлығын ояту. Екіншіден, қаланы көгалдандыруға үлес қосу. Үшіншіден, өзіміз ауасын жұтып, суын ішіп отырған қоршаған ортаның тазалығын сақтау. Міне, осындай маңызды мақсаттарды іске асыру үшін Достық үйі жанындағы саябақты таңдап алдық» -дейді Айымгүл Қосалиева.
Атыраулық белсенділер мен волонтерлар саябаққа жеміс ағаштары мен шағанның 25 түп көшетін еккен. Мұндай акция 25 мамырға дейін жалғасқалы отыр.
Жолдасбек Шөпеғұл
1993 жылы әл-Фараби атындағы ҚазМҰУ-дің журналистика факультетін бітірген. Еңбек жолын 1993 жылы республикалық «Егемен Қазақстан» газетінде тілші болып бастаған. 2020 жылғы ақпаннан бері «Kazinform» халықаралық ақпарат агенттігінде Атырау облысындағы тілшісі болып жұмыс істейді.