АСТАНА. ҚазАқпарат – Шабуылшы Килиан Мбаппе футболдан Франция құрамасының капитаны атанды, деп хабарлайды ҚазАқпарат тілшісі.
Lequipe басылымының деректеріне қарағанда, Франция командасының бас бапкері Дидье Дешам 24 жасар футболшының капитан болатыны жөнінде шешім қабылдаған.
Осыған дейін капитандық міндетін қақпашы Уго Льорис атқарған еді. Ол өз командасы 2022 жылы Қатарда өткен әлем чемпионатының финалында Аргентинаға есе жібергеннен кейін құрамадан кететінін мәлім еткен болатын.
Килиан Мбаппе капитан ретінде өз командасын 24 наурызда алғаш рет бастап шығатын болады. Бұл күні Франция 2024 жылғы Еуропа чемпионаты іріктеу кезеңінің бірінші турында өз алаңында Нидерланд құрамасын қабылдайды.
Мбаппе Франция сапында 2017 жылдан бері өнер көрсетіп келеді. Осы уақыт ішінде 66 матчта 36 гол соқты. Өз командасымен бірге 2018 жылы әлем чемпионы атанса, өткен жылы күміс жүлдегер атанды.
Еске сала кетейік, бұдан бұрын футболдан 2026 жылғы әлем чемпионатын өткізу тәртібі бекітілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).