Қырғызстанда алғаш рет халықаралық Gallops ат жарысы өтеді

АСТАНА. KAZINFORM — 19–27 шілде аралығында Қырғызстанда алғаш рет халықаралық Gallops жобасы — әлемге әйгілі экспедициялық ат жарысы өтеді, деп хабарлайды Кабар.

Шара Соңкөл атты көркем биік таулы көл аумағында ұйымдастырылады, деп хабарлады МЭК жанындағы Туризм департаментінің директоры Эрденет Касымов.

Оның айтуынша, Қырғызстан туризм саласын белсенді дамытып, халықаралық жобаларды елге тартуға күш салып келеді.

— Президент Садыр Жапаров таулы өңірлерді дамытудың бес жылдығын жариялады, ал Gallops жобасы осы бастамалармен толық сәйкес келеді. Жарыс маршрутының басталуы мен аяқталуы Жумғал ауданының Кызарт ауылында өтеді. Бұл ауыл этнотуризмді дамытып, қонақтарды қабылдауға толық дайын, — деді Касымов.

Ол сондай-ақ елде инфрақұрылымдық реформалар жүргізіліп жатқанын, бірнеше қалада жаңа ипподромдар салынып жатқанын айтты.

Gallops жобасының негізін қалаушы және жетекшісі Бади Кебир бірегей мәдениеті мен табиғатының арқасында таңдау Қырғызстанға түскенін атап өтті.

— Gallops жобасының басты мақсаты — мәдениетті дамыту, өңірді танымал ету және әлемнің түкпір-түкпірінен ат спортына қызығушылығы бар адамдарды біріктіру. Қатысушылар — негізінен табысы жоғары туристер. Бұл Қырғызстан экономикасына оң әсер етеді, өйткені олардың көбісі кейін елге қайта оралады, — деді ол.

Gallops — бұл «Париж–Дакар» үлгісіндегі ерекше ат марафоны. Бұл — командалық навигация мен төзімділік жарысы. Бес күнде қатысушылар 200 шақырымдай қашықтықты еңсереді, шабандоздық шеберлігін, рухани күшін және командалық бірлігін сынайды.

Күн сайын шабандоздар шамамен 40 шақырым жол жүреді. Әр кезеңнен кейін ветеринар аттың пульсін тексереді — ол 70 соққыдан аспауы тиіс. Егер жоғары болса, бұл — шамадан тыс жүктеме болып есептеледі. Сондықтан бақылау өте қатаң болады.

Жарысқа әртүрлі елдерден 12 команда және бір қырғыз командасы қатысады. Gallops жарысын Қырғызстанда өткізуге жобаның жергілікті үйлестірушісі Азамат Жаманкуловтың қолдау көрсетуі себеп болды.

— Gallops жобасы бұған дейін Оман, Марокко, Иордания және Үндістанда өткен. Биыл алғаш рет Қырғызстанда ұйымдастырылып отыр. 19 шілдеде шабандоздар Жумғал ауданындағы Кызарт ауылынан бастап, Соңкөл көлін айналып, қайта сол ауылға оралады, — деді Жаманкулов.

Кешкісін қатысушылар үшін мәдени шаралар, көшпенділер ойындары, қолөнер шеберлерінің шеберлік сағаттары, «Манас» эпосымен, Шыңғыс Айтматовтың шығармашылығымен және Салбуурун аңшылық өнерімен таныстыру өткізіледі.

Ұйымдастырушылар атап өткендей, қатысушылар мен қонақтарды керемет табиғат, көшпелі мәдениет және халықаралық атмосфера күтеді.

Алайда Gallops — тек жарыс емес. Мұнда жылдамдықтан гөрі достық, шытырман оқиға және табиғатпен үндестік басты құндылық болып есептеледі.

Бұған дейін қазақстандық жас теннисшілер Қырғызстандағы турнирде үздік шыққанын жазғанбыз.