Қырғызстанның халық суретшісі павлодарлық музейге Сәтбаевтың портретін сыйлады
ПАВЛОДАР. KAZINFORM – Павлодарда Қазақстанның Халық суретшісі Нағымбек Нұрмұхаммедовтың 100 жылдығына арналған халықаралық пленэр өтті. Кәсіби суретшілер мен өнертанушыларды, шығармашыл жастарды біріктірген мәдени іс-шара классикалық және заманауи өнер үдерістерін қолдаудың бірегей платформасы ретінде танылды.
«АРТ-ТӨР 2024» аталған халықаралық плэнерде түрлі кәдесыйлардың және Нағымбек Нұрмұхаммедов салған суреттер каталогының тұсаукесері жасалды. Құрметті қонақтар қатарында әйгілі суретшінің қызы, өнертанушы Мара Нағымбекқызы, ЮНЕСКО Суретшілер одағының мүшесі, ресейлік Андрей Блиок (Ресей), Қырғызстанның Халық суретшісі Юристанбек Шыгаев, әзербайжандық суретші Джалал Агаев, сондай-ақ басқа да отандық және шетелдік танымал қылқалам шеберлері болды.
Нағымбек Желал-Әд-Динұлының еңбек жолы негізінен Алматы қаласында өрілген. Аса ауқымды шығармашылығы одаққа танылып, республикалық, бүкілодақтық және халықаралық көрмелерге белсене қатысқан. Өнер иесі этюдтер мен болашақ картиналарға арналған материалдарын негізінен ел бойынша және шетелдік саяхаттарда жинаған. Оны білетіндер тұлғаның суретші ғана емес, белсенді қоғам қайраткері, өнертанушы болғанын айтады. Қазақстанның ежелгі және қазіргі заманғы өнері туралы көптеген мақалалар мен кітаптар жазған.
— Нұрмұхаммедовтың шығармашылығын менің отанымдағы әріптестерім жақсы біледі. Оны Қазақстанның бірден-бір классик суретшілерінің бірі болған деп есептейміз. Жұмыстары өте жоғары кәсіби деңгейде салынған. Ол кісінің шәкірттері шығармашылық жолды лайықты жалғастырып отырғаны қуантады. Мұндай шеберлердің еңбегін әрдайым ұлықтап, туындыларын алтындай сақтауға міндеттіміз. Мен де ол сияқты Ресейдегі Репин атындағы академияны тәмамдадым. Бұл көрмеге ерекше тартуым бар. Әлемге әйгілі ғалым Қаныш Сәтбаевтің 125 жылдығына орай ғұламаның портретін салып келдім. Оны музей қорына өткіземін, - деді Қырғызстанның Халық суретшісі Юристанбек Шыгаев.
Павлодар облыстық көркемсурет музейі 1964 жылы құрылған, Ертіс өңіріндегі ең ірі музей. Биыл құрылғанына 60 жыл отыр. Осы уақыт аралығында ұйым өңірдің өнері мен мәдениеті саласындағы үрдістер мен құбылыстарды зерттеу, құжаттау функцияларын орындайтын ғылыми-мәдени мекемеге, мәдениеттің, білім мен ғылымның дамуына оң әсер ететін музей топтамаларының қоймасына айналды.
«Бүгінде музей коллекциясында 6200-ден астам кескіндеме, графика, мүсін, сәндік-қолданбалы және театрлық-декорациялық өнер туындылары бар. 2022 жылы Павлодар облыстық көркемсурет музейіне Баянауыл ауданының тумасы, Қазақстанның Халық суретшісі, Қазақ КСР Мемлекеттік сыйлығының лауреаты Нағымбек Нұрмұхаммедовтың есімі берілді. Музей қорында суретшінің 31 туындысы сақталған, оның 6 туындысын суретшінің отбасы музей қорына табыстады», - деп атап өтті музей басшысы Ақертіс Солтанбаев.
Еске сала кетейік, Қаныш Сәтбаев пен Кемел Ақышевтің бірге түскен фотосуреттері табылды.