Жамбыл облысында екі балаға зорлық көрсеткен күдікті қамауға алынды - ІІМ

ТАРАЗ. KAZINFORM — Жамбыл облысы Талас ауданында екі кәмелетке толмаған балаға қатысты жүйелі түрде ұрып-соғу фактісі бойынша қозғалған қылмыстық істің тергелуі Ішкі істер министрі Ержан Саденовтің жеке бақылауына алынды. Бұл туралы ІІМ ресми өкілі Шыңғыс Әлекешев хабарлады.

Ресми өкілдің дерегінше, қазіргі уақытта күдікті ұсталып, уақытша ұстау изоляторына қамалған. Ал жәбірленуші балаларға қажетті медициналық және психологиялық көмек көрсетілуде.

- Сонымен қатар аталған оқиғаға байланысты жергілікті полиция қызметкерлеріне қатысты қызметтік тексеріс басталды.

Ішкі істер министрі бұл істі жеке бақылауына алды, – деп жазды Шыңғыс Әлекешев өз парақшасында.

ІІМ мәліметіне қарағанда, балаларға қатысты зорлық-зомбылықтың кез келген түрі қатаң түрде тоқтатылып, мұндай жағдайларға принципті әрі заң аясында шара қолдану көзделеді.

- Балалар қауіпсіздігі – абсолютті басымдық, – деп атап өтті Ішкі істер министрі Ержан Саденов.

Айта кетейік, Жамбыл облысының 3 ауданында құқықтық тәртіпті күшейту тапсырылды.