АСТАНА. KAZINFORM — Қытайдың Тайань қаласында өтіп жатқан «President’s Cup — Asian Region» халықаралық турнирінде таэквондошы Самирхон Абабакиров (63 келі) күміс медаль алды.
Дүниежүзілік таэквондо федерациясы Президентінің Азия аймағы бойынша кубогында ол финалға дейін үш жекпе-жек өткізді.
Қазақстан таэквондо федерациясының хабарлауынша, алдымен ол тағы бір қазақстандық спортшы Дулат Әбдімәлікті жеңсе, одан кейін ширек финалда Тайвань өкілі Хуанг Чо Ченгты тізе бүктірді.
Жартылай финалда Самирхон Оңтүстік Корея өкілі Жанг Жабинді жарыс жолынан шығарды.
Финалда әлем чемпионатының күміс жүлдегері, Азия ойындарының және Гран-при кезеңдерінің екі дүркін жеңімпазы Джунг Джанге (Оңтүстік Корея) есе жіберіп, күміс жүлдені қанағат тұтты.
Айта кетсек, бұдан бұрын ел құрамасынан Батырхан Төлеуғали (80 келі) мен Азиза Каражанова (53 келі) қола жүлде алған еді.
Бұл үш медаль Қазақстан құрамасына 2026 жылғы Азия чемпионатына қатысу үшін қосымша жолдама иеленуге мүмкіндік береді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.