ОРАЛ. KAZINFORM — «Астана-Орал» рейсінен 12 жасар Зерені әуежайда қалдырып кету оқиғасы бойынша қыздың анасына 5 млн теңге төленді.
Баланың қорғаушысы Данильхан Шағатаевтың Instagram әлеуметтік желісінде мәлім еткеніндей, сот шығындарын қоса алғанда, қыздың анасы 5 млн теңгені толық көлемде алған.
Air Astana компаниясы мәжбүрлеп орындауға жеткізбестен, сот шешімін орындады.
Оның сөзіне қарағанда, өткен жылдан бері созылған іске нүкте қойылды.
— Көп адам соттаспай-ақ 4 млн теңгені алу керек деп айтып жатты. Зеренің анасы басқа шешім қабылдады, ол дұрыс болып шықты. Қоғамдық пікір туғызған бұл іс қолданыстағы жолаушылар тасымалы заңнамасына, сондай-ақ FlyArystan әуе компаниясының ішкі ережесіне өзгерістер енгізуге түрткі болды, — дейді Д. Шағатаев.
Оның айтуынша, Air Astana компаниясы барлығы 8 млн 692 мың теңге шығынға қалды, бұған әкімшілік айыппұл мен моральдық залал кіреді.
Еске сала кетейік, бұдан бұрын қыз баланы әуежайда қалдырып кету оқиғасы бойынша Air Astana сотта жеңілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).