ОРАЛ. KAZINFORM — Белгілі театр және кино актрисасы, Қазақстанның еңбек сіңірген әртісі, «Құрмет» және «Парасат» ордендерінің иегері Меруерт Өтекешоваға Батыс Қазақстан облысының құрметті азаматы атағы берілді.
Осыған орай туған жеріне келген өнер қайраткеріне марапат табыс етілді.
Меруерт Қаратайқызы өзін сыйлап, құрметтегені үшін Батыс Қазақстан облысы жұртшылығына шынайы ризашылығын білдірді.
Меруерт Өтекешова 1951 жылдың 25 ақпанында Орал қаласында дүниеге келген.
1969-1973 жылдары Қазақ мемлекеттік Құрманғазы атындағы өнер институтының театр факультетінде оқыды.
1973 жылы М. Әуезов атындағы қазақ мемлекеттік академиялық драма театрының актерлік құрамына қабылданды.
Меруерт Өтекешова театр мен кинода көптеген рөлдерді сомдады. Соның ішінде «Қыз Жібек» кинофильміндегі Қыз Жібек бейнесімен кеңінен танылды.
БҚО мәслихатының шешімімен сондай-ақ мемлекеттік қызмет саласында ұзақ жыл қызмет атқарған Мирболат Жақыпов пен Табылғали Сапаровқа да «Батыс Қазақстан облысының құрметті азаматы» атағы берілді.
Еске сала кетейік, бұдан бұрын Қарағандыда Меруерт Өтекешованың мерейтойына арналған көрме ашылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).