Облыстық қылмыстық атқару жүйесі департаментінің мәліметінше, ол үш ай бұрын қалалық пробация қызметінің есебіне алынып, аяғына электронды бақылау білезігі тағылған.
— Сот жүктеген міндеттермен танысып, жазаны өтеу тәртібін сақтауға тиісті. Пробация қызметкерлері тұрақты түрде профилактикалық жұмыс жүргізген. Алайда сотталған азамат белгіленген талаптарды орындамай, жазаны өтеу тәртібін бірнеше рет бұзған. Осыған байланысты оған ескерту жасалған. Жуырда ішімдік ішіп, қыдырмақ болып электронды білезікті әдейі сындырып, үйіне тастап кеткен. Осылайша пробациялық бақылау талабын өрескел бұзып, бақылаудан тыс қалуға тырысқан, — делінген хабарламада.
Бақылау құралын әдейі бүлдіру жазаны өтеу тәртібін бұзу ретінде қаралады. Қазіргі күні заңға бағынбаған азаматқа қатысты құжаттар сотқа жолдау үшін жинақталып жатыр.
Бұған дейін Астана прокуратурасы пробациялық бақылаудан өтетін азаматтарға қойылатын талаптар мен оны бұзған жағдайда туындайтын жауапкершілікті түсіндірді.