ҚЫЗЫЛОРДА. KAZINFORM — Қызылорда қаласында сауда орталығында жарылғыш зат бар екендігі жөніндегі хабарлама жалған болып шықты.
Әлеуметтік желіде айтылғандай, 1 шілдеде қала орталығында орналасқан сауда орталығында жарылғыш зат бар екендігі жөнінде хабар түскен.
Тұрғындар сыртқа шығарылған.
Оқиғаға байланысты Қызылорда облыстық полиция департаменті түсініктеме берді.
«Оқиға орнына шұғыл түрде жедел қызметкерлер жіберілді. Тексеру жұмыстары жүргізіліп, нәтижесінде тыйым салынған заттар мен жарылғыш құрылғылар табылған жоқ. Қызылорда облысының полиция департаменті терроризм актісі туралы көрінеу жалған хабарлама үшін жауапкершілік қарастырылғанын ескертеді», — деп атап өтті департаменттен.
Еске салсақ, бұдан бұрын Қызылордада қалалық орталық емханадан өрт шыққан еді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.