ҚЫЗЫЛОРДА. KAZINFORM - Қызылорда қаласының тұрғыны Күлмарам Қонысбаева халықаралық әйелдер күні қарсаңында 101 жасқа толды. Ғасыр жасаған ана 2 баласынан 4 немере, 12 шөбере, 1 шөпшек сүйіп отыр.
Жүздің жүзін көрген Күлмарам Қонысбаева 1923 жылдың 10 ақпанында дүниеге келген, тыл және еңбек ардагері. Көп жылдар бойы Қазалы аудандық емханасында еңбек еткен. Бүгінгі күні 2 баласынан 4 немере, 12 шөбере, 1 шөпшек сүйген аяулы әже. Ғасыр жасаған ақ жаулықты ананы қала әкімі Серік Қожаниязов құттықтап барды.
«Сіз ел басына күн туған шақта ер-азаматтармен иық тіресе тылда еңбек етіп, Ұлы жеңісті жақындатуға үлесіңізді қостыңыз. Соғыс жылдарынан кейін де қазақ әйеліне тән қарапайымдылық үлгісінен танбай халыққа қалтқысыз қызмет еткен Сіздің ғұмыр жолыңыз ұрпаққа өнеге», - деді қала әкімі.
Облыста жасы жүзден асқан 20 қария бар. Олардың 8-і Қызылорда қаласында тұрады. Олардың басым бөлігі көп бала тәрбиелеп өсірген аналар.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.