Клубтар арасындағы ӘЧ: «Челси» алғашқы ойынында жеңіске жетті

АСТАНА. KAZINFORM — Бүгін футболдан клубтар арасындағы әлем чемпионатын Англияның «Челси» командасы сәтті бастады.

D тобында сынға түсіп жатқан лондондық клуб алғашқы турда АҚШ-тың «Лос-Анджелес» клубымен кездесті. 

Ойын барысында англиялық клубтан Педру Нету 34-минутта есеп ашса, Энцо Фернандес 79-минутта мергендік танытты.

Осылайша «Челси» қарсыласынан 2:0 есебімен басым түсті.

Сондай-ақ аталған топта Бразилияның «Фламенго» клубы дәл осындай есеппен Тунистің «Эсперансын» тізе бүктірді. 

Ал С тобындағы «Бока Хуниорс» (Аргентина) және «Бенфика» (Португалия) кездесуінде 2:2 есебі тіркелді.

Енді 17 маусымда F тобында «Флуминенсе» (Бразилия) мен «Боруссия Дортмунд» (Германия), Е тобында «Ривер Плейт» (Аргентина) пен «Урава Ред Даймонс» (Жапония) ойнайды.
Доп додасында 32 команда сынға түседі. Командалар 8 топқа бөлінді. Әр топта 4 клубтан ойын көрсетеді, олардың екеуі плей-офф кезеңіне шығады.

Қатысушылардың арасында биылғы Чемпиондар лигасының жеңімпазы «Пари Сен-Жермен» бар. Сонымен қатар еуропаның үздік клубтары «Реал Мадрид», «Манчестер Сити», «Бавария» және т.б клубтар турнирде бақ сынайды.

Чемпионаттың жүлде қоры 1 миллиард АҚШ долларын құрайды. Аталған турнирде чемпион болған команда 125 миллионды иеленеді. Қалған қаражатты қатысушы 31 клуб алған орындарына байланысты бөліседі.