Оның айтуынша, жедел ден қою шаралары аясында санитариялық-эпидемиологиялық қызмет бірқатар нысанда анықталған заңбұзушылықтарға байланысты тиісті шаралар қабылдаған.
— Санитариялық-эпидемиологиялық қызмет 6 нысанның қызметін тоқтату туралы қаулы шығарды. Міндетті медициналық тексеруден өтпеген қызметкерлерді жұмыстан шеттету жөнінде 4 қаулы қабылданды. Сонымен қатар қауіпсіздік талаптарына сәйкес келмейтін 94 келіден астам өнім айналымнан алынды, — деді Сархат Бейсенова.
Спикердің сөзінше, қазір санитариялық-эпидемиологиялық қызмет қоғамдық тамақтану саласындағы 20 мыңнан астам нысанды тұрақты бақылауда ұстап отыр.
— Биылғы жылдың алғашқы бес айында 600-ден астам тексеру жүргізілді. Оның қорытындысы бойынша жалпы сомасы 50 миллион теңгеден асатын әкімшілік айыппұл салынды, — деді комитет төрағасы.
Еске салайық, бұған дейін Астанада биылғы алғашқы бес айда жіті ішек инфекцияларымен сырқаттану көрсеткіші өткен жылдың сәйкес кезеңімен салыстырғанда 10 пайызға төмендегенін жазған едік.