Көкшетау университетінде ақпараттық технологиялық орталық ашылды

КӨКШЕТАУ. Мамырдың 6-сы. ҚазАқпарат /Жанмұрат Жанайдаров/ - Шоқан Уәлиханов атындағы Көкшетау мемлекеттік университетінде ақпараттық технологиялық орталық ашылды,

деп хабарлайды ҚазАқпарат тілшісі.Озық технологиялық орталықтың ашылу салтанатына қатысқан ҚР Білім және ғылым вице-министрі Күләш Шәмшиденова жоғары оқу орнындағы атаулы оң өзгерістердің жастарға терең, жан-жақты білім беруде тамаша табыс екенін атап көрсетті. Бірыңғай интернеттік жүйеге қосылған 30-ға тарта жаңа компьютермен жарақталған кабинетте білім қуған жастардың әлемдік деңгейде ақпарат алуына барлық мүмкіндік қарастырылған. Студенттердің әрқайсысына жеке код белгіленген. Сол бойынша білім деңгейі, оқу үлгерімі жайында ақпарат алуға болады. Мұның өзі, сайып келгенде студенттерге, ұстаздарға, факультет жетекшілері мен кафедра меңгерушілеріне жақсы көмек болмақ. Жеткіншектер әлемдік ақпарат көзіне шығып, қажетті кітаптармен, әдістемеліктермен, оқулықтармен таныса алады. Вице-министрдің қатысуымен өткен алқалы басқосуда оқу орнындағы білім беру ісінің бүгінгі ахуалы, ғылыми жұмыстар, оған студенттердің қатыстырылуы, материалдық базаның нығайтылуы, жастарға көрсетілер әлеуметтік көмек жайы тілге тиек етілді. Сонымен қатар алдағы уақытта есте болатын тұстарға назар аударылды.