Көкшетауда құны 239 млрд теңгеге ЖЭО салу жоспарда бар - Алмасадам Сәтқалиев

КӨКШЕТАУ. ҚазАқпарат - ҚР Энергетика министрлігінің басшысы Алмасадам Сәтқалиев Степногор қаласының тұрғындары алдында есеп беру кездесуін өткізіп, онда Ақмола облысының отын-энергетика кешенінің қызметі туралы айтып, тұрғындардың сауалдарына жауап берді, деп хабарлайды ҚазАқпарат тілшісі.

Кездесуде министр жалпы Ақмола өңірінің отын энергетика кешені ағымдағы жағдайы туралы баяндады. Өңірдің электр энергетикасы туралы айта келе, министр Көкшетауда электр қуаты 240 МВт болатын ЖЭО салу жоспарланып отырғанын атап өтті. Құрылыстың жалпы құны – 239 млрд. теңгеден асады.

Жобаны іске асыруды биылғы жылдың күзінде өткізілетін электр қуаты нарығында тендер өткізу арқылы жүзеге асыру жоспарлануда. Қазіргі таңда өңірді жылумен қамтамасыз ету өзекті мәселелердің бірі болып отыр. Қолданыстағы жылу көздерінің тозу деңгейі жоғары (Степногор ЖЭО 81,7%, «Көкшетау Жылу» МКК қазандықтары 63,1%).

«Тұрғын үйлердің, әлеуметтік нысандар мен ғимараттардың қарқынды құрылысы жүргізіліп жатқанын ескерсек, алдағы уақытта аудандық қазандықтардың жұмыс істеп тұрған жылу қуаты жеткіліксіз. Жылу энергиясының тапшылығын жабу үшін Көкшетау ЖЭО құрылысы қарастырылуда, оның жылу қуаты сағатына 520 Гкал құрайды», - деді министр.