АҚТӨБЕ. KAZINFORM – Велосипед тізгіндеген ерлі-зайыпты адамдарды көлігімен қағып, мерт қылған күдікті Ақтөбе облыстық полиция департаментінің қызметкері болып шықты. Ол қазір тергеу изоляторында отыр. Сонымен бірге 7 тәртіп сақшысы қызметінен босатылды.
Ақтөбе облыстық полиция департаменті жол-көлік оқиғасынан соң жүргізушінің, яғни полиция қызметкерінің ұсталғанын, тергеу изоляторына қамалғанын хабарлады.
– Қазір соталды тергеу жұмысы жүріп жатыр. Жүргізуші қамалды. Осы оқиғадан соң қызметтік тексеру жүргізілді. Тексеруден соң 7 қызметкер, соның ішінде басшылары да қызметтен босатылды, - деп хабарлады Ақтөбе облыстық ПД баспасөз қызметінің жетекшісі Ерболат Сарқұлов.
Еске салсақ, 23 шілде күні сағат 00:50-де Ақтөбе қаласы Ақжар-1 ауылы маңында жеңіл көлік иесі велосипед мінген екі адамды қағып кетті. 25 және 26 жастағы ерлі-зайыпты оқиға орнында көз жұмды. Олардың артында екі баласы қалды.
Алтынай Сағындықова
2001-2006 ж.ж. Қ.Жұбанов атындағы Ақтөбе мемлекеттік университетін тәмамдады. Мамандығы - журналист. Еңбек жолын 2006 жылы "Kerek.info" қоғамдық-ақпараттық газетінен тілші болып бастап, шеф-редактордың орынбасары, шеф-редактор болды. Әртүрлі жылдары "Айқын" қоғамдық-саяси газеті, Bnews.kz, Aktobenews.kz тілші қызметін атқарды. 2017 жылдан бастап Kazinform агенттігінің Ақтөбе облысындағы меншікті тілшісі.