Көлік ішінде қысылып қалған қызылордалық құтқарылды
21:05, 14 Ақпан 2019
ҚЫЗЫЛОРДА. ҚазАқпарат - Қызылордада көлік ішінде қысылып қалған жүргізушіні алып шықты, деп хабарлайды ҚазАқпарат тілшісі.
Облыстық төтенше жағдайлар департаментінің хабарлауынша, оқиға 14 ақпанда түнгі сағат 2-де А.Байтұрсынов көшесі бойында болған. Құтқарушылар «Ауди» маркалы көліктің ішінде қысылып қалған жүргізушіні аман алып қалды.
«Біздің қызметкерлер көлік апатынан зардап шегушіні құтқару үшін гидравликалық құрал-жабдықты пайдаланды. Осылайша оны көлік ішінен босатып алды. Ол үшін көлік металлдарын кесуге тура келді», - деді Қызылорда облыстық төтенше жағдайлар департаментінің мемлекеттік тіл және ақпарат тобының бас маманы Айгүл Нұрманова.
Көлікте қысылып қалған азамат 1987 жылы туған. Оған медициналық көмек көрсетілді.