НҰР-СҰЛТАН. ҚазАқпарат - Көлік полицейлері Алматы облысында жасырын орыннан қару-жарақ тапты, деп хабарлайды ҚазАқпарат тілшісі.
ҚР ІІМ Көліктегі полиция департаменті ұйымдасқан қылмысқа қарсы күрес басқармасының қызметкерлері Қонаев қаласының маңында жедел іздестіру іс-шараларын жүргізу барысында құрылыс қалдықтарының үйіндісі аумағында теріге оралған тегіс ұңғылы 4 аңшылық мылтық пен 12-калибрлі 22 оқ-дәрі тауып тәркіледі.
Көліктегі полиция департаментінің бастығы, полиция генерал-майоры Оңал Бекеевтің мәлім еткеніндей, аталған дерек бойынша ҚР ҚК 287-бабы 3-бөлігіне (қару мен оқ-дәрілерді заңсыз сақтау) сотқа дейінгі тергеу амалдары жүргізілуде.
«Қазіргі кезде қару мен оқ-дәрілерді сақтауға қатысы бар адамдар анықталуда. Алынған заттай дәлелдемелер сот-баллистикалық сараптамаға жіберілді», - деді ҚазАқпарат тілшісіне О.Бекеев.
Еске сала кетейік, бұдан бұрын елордада жолаушыға тиісіп, балағаттаған жүк тиеушінің жауапқа тартылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).