Көлсай аумағында Тянь-Шань қоңыр аюы бейнетұзаққа түсіп қалды

ҚОНАЕВ. KAZINFORM — «Көлсай көлдері» мемлекеттік ұлттық табиғи паркі аумағында жабайы жануарларды бақылау мақсатында орнатылған бейнетұзақтардың біріне Қазақстанның Қызыл кітабына енгізілген Тянь-Шань қоңыр аюы қайтадан түсіп қалды.

Орман шаруашылығы және жануарлар дүниесі комитетінің мәліметінше, бұл сирек кездесетін бейнежазба — қоңыр аюлардың ұлттық парк аумағында әлі де мекендейтінін дәлелдейді және табиғи ортаның тұрақтылығын көрсетеді.

— Аталған дерек табиғатты қорғау бағытында қабылданып жатқан шаралардың тиімділігінің маңызды айғағы. Жабайы жануарларды бақылау жұмыстары жалғасады, — делінген комитет жазбасында.

Еске салайық, бұған дейін Шығыс Қазақстан облысында фототұзаққа сирек кездесетін қар барысы түсіп қалғанын жазғанбыз.