Комитет инспекторларының тексеруі кезінде «Фауна Эйр» әуе компаниясының Қазақстандағы азаматтық әуе кемелерінің пайдаланушыларына қойылатын сертификациялық талаптарды бұзғаны анықталған.
«Ұшу қауіпсіздігін қамтамасыз етпегені үшін ҚР ИДМ Азаматтық авиация комитеті 2018 жылдың 8 қазанынан бастап «Фауна Эйр» ЖШС-нің авиациялық жұмыстарға берілген куәлікті пайдалануға шектеу қойды», - делінген Азаматтық авиация комитетінің Фейсбук парақшасындағы хабарламада.
Бұған дейін Азаматтық авиация комитеті ҚР Бас көлік прокуратурасымен бірлесіп жүргізген жұмыстың нәтижесінде 17 ұшақтың және шағын авиацияның 2 әуе компаниясының (Азия Континенталь Авиалайнс және «КАЗАВИА» тәуелсіз әуе компаниясы» ЖШС) қызметі уақытша тоқтатылған болатын. Сондай-ақ, рейстің және техникалық жұмыстардың сапасыз ұйымдастырылуына байланысты 16 әуе компанияның лауазымды тұлғаларына қатысты тәртіптік шаралар қабылданған.