Қонаевта жаңа темір жол станциясы салынуы мүмкін
ҚОНАЕВ. KAZINFORM – Жеке инвестор Қонаев маңында теміржол станциясын салуға мүдделі. Бұл туралы Қонаев әкімдігі хабарлады.
Жолаушылар тасымалы және автомобиль жолдары бөлімінің басшысы Бағдат Алиевтің айтуынша, Қонаев қаласына қарасты Бөктер ауылында теміржол станциясы салынса, Қапшағайдың солтүстік жағажайларының дамуына мүмкіндік туады.
— Қазір бұл теміржол арқылы тек жүк тасымалданып жүр. Алдағы уақытта «Қазақстан теміржолы» ҰК» АҚ» осы жобаны қолдаса, инвестор тартсақ, қаладағы туризм дамиды. Жолаушылар қатынасына тағы бір бағыт қосылады. Осылайша, шомылу маусымында демалушылар саны өседі, — деді Бағдат Алиев.
Ал қала әкімі инвестициялық жобаны әлі де талқыға салу қажеттілігін атап өтті.
— Алматы облысының басшылығы мен теміржолға жауапты мекемелерден қолдау табылса, Қонаев қаласының әкімдігі инвесторлармен жұмыс істеуге әрдайым ашық, — деді әкім Асхат Бердіханов.
Айта кетейік, былтыр қалаға 103,1 млрд теңгеден астам инвестиция тартылған.
Еске салайық, бұған дейін Қапшағайда биыл жаңа жағажайлар ашылатынын жазғанбыз.