Конституциялық сотқа 9 мың азаматтан өтініш түскен

АСТАНА. KAZINFORM –Мәжілістің жалпы отырысында палата төрағасы Ерлан Қошанов Президент Қасым-Жомарт Тоқаев бастамашы болған саяси реформаның заң үстемдігін орнатудағы орны туралы пайымын айтты.

- Конституциялық соттың құрылуы сот төрелігі мен азаматтардың құқықтарын қорғаудағы жаңа леп болды. Бұл құқықтық мемлекетті нығайту мен әділеттілікті қамтамасыз етудегі маңызды қадам. Аталған институт жаңа құқықтық архитектураның өзегі болмақ. Конституциялық сотқа қарапайым адамдардан тоғыз мыңнан астам өтініш түскен, - деді Ерлан Қошанов. 

Сондай-ақ, Мәжіліс спикері Адам құқықтары жөніндегі уәкіл институтына конституциялық мәртебе берілгенін еске салды. 

- Балалар омбудсменінің жұмысы айтарлықтай жаңартылды. Президенттің омбудсмендерді тікелей қолдауы халық құқығын қорғаудың сапасын жаңа деңгейге көтергенін уақыт көрсетіп отыр, - деді палата төрағасы.

Бұған дейін Премьер-министр Олжас Бектенов Үкіметтің ресми сайтына «Ілгерілеуге бастаған алты жыл: Қазақстан орнықты даму жолында» мақала жариялаған еді.