Жалпы ұзындығы 3,3 шақырым болатын жолды жобалау мен қаржыландыруға «Қор» мұнай компаниясы 450 млн. теңгеден астам қаржы бөліп отыр.
«Қор» компаниясы баспасөз қызметінің хабарлауынша, жобаға сәйкес құрылыс жұмыстарын «АСД Компани» ЖШС мен «Арна» АҚ жүргізді. Жолдан бөлек компания қаржысына 2 көпір салынып, Қызылорда-Құмкөл трассасы ішінара жөндеуден өткізілді.
Қала мен ауылды жалғастыратын жолдың ашылу салтанатында «Қор» мұнай компаниясының бас директоры Марат Нұрпейісов өздерінің шаһар инфрақұрылымын дамытуға қосқан бұл үлесі бизнестің әлеуметтік жауапкершілігі бағдарламасы аясында жүзеге асқан игілік екендігін атап өтті. Сондай-ақ ол алдағы уақытта күре жолды толық асфальттандыру жоспарланып отырғандығын жеткізді. Соңғы 2 жылда аймақ тұрғындарының жағдайын жақсартуға 200 млн. теңгеден астам қаржы жұмсаған компания әлде де әлеуметтік мәселелердің шешілуіне үлес қосады.
Қала әкімінің орынбасары Бегман Көлбаев әлеуметтік саладағы әріптес компания ұжымына алғыс білдіріп, жаңа жолдың салынуы қосымша 6 мың гектар алқапты шаруашылық айналымға енгізуге мүмкіндік беретінін айтты.
Салтанатта ақсақалдар ел тілегіне енжар қарамаған «Қор» компаниясының басшылығына ауыл тұрғындары атынан ризашылықтарын жеткізді.