ҚЫЗЫЛОРДА. ҚазАқпарат - Қызылорда қаласында карантин режимінің қатаңдатылуына байланысты залалсыздандыру жұмыстары күшейтілді, деп хабарлайды ҚазАқпарат тілшісі.
Бұл мақсатта №66597 әскери бөлімі мен арнайы мекемелер белсене атсалысып отыр. Дезинфекциялаудың үшінші кезеңінде 500 мың шаршы метр аумақ залалсыздандырылды.
«Бүгінгі күнге дейін облыс орталығында 6 миллионға жуық шаршы метр жерге залалсыздандыру жұмыстары жүргізілді. Ол үшін 28 арнайы техника және 200-ге жуық қызметкер тартылды. Осы бағыттағы жұмыстарды күшейту мақсатында облыс орталығында тағы 8 бірдей залалсыздандыру тоннелі орналастырылды. Олар үлкен сауда орындары мен №2 Мұрагер мектебінің ауласына, Қорқыт Ата атындағы ҚМУ-дың ғимараттары жанына және қалалық мәдени және демалыс паркіне қойылды», - деп мәлім етті Қызылорда қаласының әкімдігі.
Бұған дейін Қызылорда қаласында карантин режиміне өзгерістер енгізілген болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.