Коронавирустың «омикрон» штамын балалар қалай еңсереді

АЛМАТЫ. ҚазАқпарат - Алматы қалалық қоғамдық денсаулық сақтау басқармасының басшысы Нариман Табынбаев коронавирустың «омикрон» штамы балаларға қалай әсер ететіні туралы айтты, деп хабарлайды ҚазАқпарат тілшісі.

«Өкінішке орай, балаларда омикрон штамын жұқтырып жатыр. Статистикалық мәліметтерге сүйенсек, жыл басынан бері 1000-ға жуық бала емделді, 32 бала жансақтау бөлімінде жатты. Аброй болғанда өлім болған жоқ. Бүгінгі күні инфекциялық ауруханада 10 бала жатыр, реанимацияда науқас бала жоқ», - дейді ол.

Оның айтуынша, омикрон жұқтырған балаларда катаральды құбылыстар байқалады: түшкіру, жөтелу, мұрыннан су ағу, дене қызуының көтерілуі, иіс пен дәмнің жоғалуы.

Ал жөтел пневмонияға әкелуі мүмкін.

«Сондықтан біз оған немқұрай қарай алмаймыз. Балалардағы ауру жеңіл өтеді деп айта алмаймыз. Біз жеңіл немесе орташа ауырлықтағы балаларды ауруханаға жатқызуға тырысамыз. Олар толық жазылғанан кейін ғана үйіне шығады. Бүгінгі таңда балалар арасындағы омикрон штаммына қатысты жағдай бақылауда. Қалада жаңадан анықталған жағдайлардың азаю үрдісі байқалады», - деді спикер.

Бұған дейін Нариман Табынбаев Алматының инфекциялық стационарларында коронавируспен ауыратындар саны бірнеше есе азайғаны туралы айтқан болатын.