АСТАНА. KAZINFORM — Қазақстандық теннисші, 40 жастағы Галина Воскобоева жұптық сында Монреаль (Канада) WTA 1000 турнирінің екінші айналымына жолдама алды.
Г.Воскобоева төрт жылдық үзілістен кейін өткен айда ресейлік Камилла Рахимовамен бірге Вашингтон WTA 500 жарысында бақ сынап, онда алғашқы айналымда америкалықтар Софья Кенин — Кэролайн Доулхайдқа 5:7, 3:6 есебімен есе жіберген еді.
Бұл жолы К.Рахимовамен бірге Монреальда бастапқы кездесуін норвегиялық Улрикке Эйкери — жапониялық Эри Ходзумимен өткізді.
Қазақстандық-ресейлік жұп 6:2, 6:4 есебімен басым түсті.
Бір сағат 21 минутқа созылған бәсекеде Воскобоева — Рахимова 2 эйспен бірге 8 брейк-пойнттың бесеуін пайдаланды. Қарсыластары 1 эйс, 2 брейктен (8 брейк-пойнт) аса алмады.
Галина Воскобоева — Камилла Рахимова ширек финалға шығу үшін америкалықтар С. Кенин — К.Доулхайдпен таласады.
Еске сала кетейік, Галина Воскобоеваның тенниске қайта оралғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).