ОРАЛ. 3 мамыр. ҚазАқпарат - Соңғы кездері Орал қаласының мамандандырылған әкімшілік сотына тазалыққа қатысты 40 әкімшілік материал түсті.
Облыстық соттың баспасөз қызметінен Гүлмира Кенжеғалиеваның хабарлағанындай, оның барлығы қоғамдық орындар мен қоршаған ортаны ластауға байланысты. Елбасымыздың сөйлеген сөзінен кейін еліміздің полицейлері қоғамдық және өзге де жерлерде ластауға жол берген жандарға шара қолдана бастады.
Оралдағы мамандандырылған әкімшілік соты жаяу жүргіншілер жолына үш пластикалық ыдыс пен полиэтилен пакетін лақтырған қала тұрғынының ісін қарады. Құқық бұзған әйел адам сол кезде мас күйде болған. Бұдан бөлек, ол бұрын да ұсақ бұзақылықпен ұсталып, оған әкімшілік айыппұл салынған. Алайда, ол айыппұлын төлемеген. Сот осы жағдайларды ескере отырып, әйелді 1 тәулікке қамау жөнінде қаулы алды.
Қалған істерге байланысты айыппұлдар салынды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).