Көшербаев 170 пәтерлі көпқабатты үйдің алғашқы іргетасын қалады
Тұрғын үй құрылысын «Самұрық-Қазына» жылжымайтын мүлік қоры» АҚ мен «Бақ-береке 2030» ЖШС бірлесіп жүзеге асырады, деп хабарлады ҚазАқпарат тілшісі.
«Бақ-береке 2030» ЖШС директоры Қайрат Ерназаровтың айтуынша, нысанда екі бөлмелі - 100, үш бөлмелі 70 пәтер болады. Құрылыстың жалпы аумағы 2 гектарды құрайды, оны 2017 жылы аяқтау жоспарлануда.
Аймақ басшысы Қырымбек Көшербаев және «Самұрық-Қазына» жылжымайтын мүлік қоры» АҚ Басқарма төрағасы Бауыржан Мамыталиев үйдің іргетасына «уақыт капсуласын» қалап, қызылордалықтарды құрылыстың басталуымен құттықтады.
«Соңғы жылдардағы айтулы жетістіктердің бірі - тұрғын үй құрылысы саласындағы жақсы нәтижелер. 2004 жылы аймақта 92 мың шаршы метр тұрғын үй пайдалануға берілді. Қазір бұл көрсеткіш 500 мың шаршы метрге ұлғайып, 5,5 есеге өсті. Тек өткен жылы құрылыс көлемі 3,5 есеге артты, оның ішінде Қызылорда қаласында 8 есеге жоғарылады. Биыл көпқабатты 80 үйдің құрылысы жүріп жатыр. Жалпы соңғы үш жылда Қызылордада 11 шағынаудан бой көтерді»,- деді облыс әкімі.