Көшпенділер ойындары: Қазақстаннан екі мерген финалға шықты
АСТАНА. KAZINFORM — Бүгін 5-ші Дүниежүзілік көшпенділер ойындарында Дәстүрлі садақ ату бойынша Қалқан нысанасын көздеуден сайыс өтіп жатыр. Оған 33 мемлекеттен 120 ер және 60 әйел қатысуда.
Қалқан нысанасын көздеуде ерлер 60 метр, әйелдер — 50 метр қашықтықта нысана көздейді. Мұнда әр спортшыға 7 мүмкіндіктен беріледі, әр мүмкіндікте 3 минут уақыт болады және 7 жебе атылады.
Әр тиген оққа 1 ұпай беріледі, ең жоғары ұпай — 49. Ұпай сандары тең түскен жағдайда 7 жебемен тағы бір мүмкіндік беріледі. Тағы да тең түссе — нысананың ортасына ең жақын тиген оқ есепке алынады.
Жарыс қорытындысы бойынша ерлер арасында қазақстандық Ербол Тәпенов пен Қанат Қасымхан, мажарстандық Ласло Кочка және моңғолиялық Цэвээн Худерчулуун финалға шықты.
Әйелдер арасында бүгін қазақстандық спортшылар финалға шыға алмады, жүлде орындар үшін ресейлік Анна Алексеева, мажарстандық Барчай Николет Илона, үндістандық Сури Рено және қырғызстандық Әсел Садырова таласады.
Финал ойындары бүгін Астанадағы «Арғымақ» ат-спорт кешенінде сағат 16:00–де басталады.
Айта кетейік, кеше Дәстүрлі садақ атудан Пута нысанасын көздеуде қазақстандық спортшылар бір алтын, екі қола медаль жеңіп алды.
Бүгін Дүниежүзілік көшпенділер ойындарында спортшылар жалпы 10 спорт түрінен сынға түседі.