Қостанай облысында нәресте өлімі үшін бас дәрігерлерге сөгіс жарияланды

ҚОСТАНАЙ. KAZINFORM — Денсаулық сақтау саласындағы негізгі көрсеткіштер бойынша теріс динамикаға жол бергені үшін бірден төрт бас дәрігер сөгіс алды, деп хабарлайды Kazinform агенттігінің тілшісі.

Қостанай облыстық денсаулық сақтау басқармасының мәліметінше, Қарабалық, Қостанай аудандарының, Қостанай қаласындағы №3 емхананың және Рудный қалалық емханасының медициналық мекемелері теріс көрсеткіштерге байланысты қатаң сөгіс алады.

Ведомство басшысы Данияр Жандаевтің айтуынша, денсаулық сақтау саласындағы ең өзекті мәселелердің бірі — нәресте өлімінің деңгейі.

– Біз 2024 жылдың алғашқы бес айына салыстырмалы талдау жүргізіп отырмыз. Мониторинг аясында үш түсті аймақ жүйесі пайдаланылады: жасыл аймақ – екі жыл қатарынан нәресте өлімі тіркелмеген мекемелер, сары аймақ – былтыр өлім жағдайлары болған, бірақ биыл тіркелмеген мекемелер, ал қызыл аймақ – биыл да өлім тіркеліп, 2023 жылғы шекті көрсеткіштен асып кеткен мекемелер, – деп түсіндірді Д. Жандаев.

Оның айтуынша, қызыл аймаққа түскен медициналық ұйымдардың басшылары тәртіптік жауапкершілікке тартылады. Егер тоғыз айдың қорытындысы бойынша көрсеткіштер жақсармаса, басшылық қызметке сай келетін-келмейтіні қаралатын болады.

Сонымен қатар, Жандаевтің айтуынша, қазіргі таңда медицина ұйымдарының басшылары жұмыс жүйесін қайта құруы тиіс – оқыту семинарларын өткізу, тәжірибе ұйымдастыру, нәрестелерді күтіп-баптау бойынша нақты жүйе қалыптастыру және, тиісінше, нәресте өлімінің алдын алу қажет.

Бұған дейін облыстық денсаулық сақтау басқармасының басшысы Данияр Жандаев балалар облыстық ауруханасын жөндеуге қатысты дау бойынша істің қай сатыда тұрғанын да мәлімдеген еді.

Еске сала кетейік, бұған дейін Президент көлік саласындағы кемшіліктер үшін Марат Қарабаевқа сөгіс жариялаған болатын.