Қостанайда 42 көпқабатты үй, мектеп пен әуежай жылудан ажыратылды

Қостанай облысында магистральды құбырдағы апатқа байланысты 42 көпқабатты үй, мектеп пен әуежай жылудан ажыратылды, деп хабарлайды Кazinform «Қостанай жылу энергетика компаниясы» РМК-ға сілтеме жасап.

«Герасимов көшесі, 4 мекенжайындағы үйдің жанында орналасқан жерасты жылу құбырының жарылу салдарын жою үшін 20 желтоқсан, сағат 12.00 - 20.00 аралығында 42 көпқабатты үй, №29 орта мектеп мен Қостанай Халықаралық әуежайы жылудан ажыратылады.

Келтірілген қолайсыздықтар үшін кешірім сұраймыз және жұмыстарды неғұрлым тезірек аяқтауға бар күш-жігерді салатын боламыз», - делінген таратылған хабарламада.

Еске салайық, 11 желтоқсан күні де Қостанай жылу желісінде төтенше жағдай орын алған еді.