Қостанайда патрульдік полиция көлігі апатқа ұшырады

ҚОСТАНАЙ. ҚазАқпарат - Қостанай ІІБ жол-патрульдік полициясы көлігінің қатысуымен болған жол-көлік апаты бойынша қызметтік тергеу жүріп жатыр. Бұл туралы ҚазАқпарат тілшісіне Қостанай облыстық ІІД баспасөз қызметінен хабарлады.

Оқиға мас күйінде көлікті басқарған жүргізушінің көлігін қуу барысында орын алды. Рөлге мас адамның отырғаны туралы полицейлерге қостанайлық тұрғын хабарлапты. Аталған факті бойынша жол-патрульдік қызметінің нарядтары жіберілді. Автопатрульдердің бірі Гашек көшесінде тәртіп бұзушыны аңғарып, оның ізіне түскен.

«Жол-патрульдік полицияның экипажы «Ауди» көлігінің соңынан қуғынға түскенде қауіпсіздік шараларын сақтаған, олар арнайы дыбыстық дабылды, арнайы жарықтарын қосқан», - делінген баспасөз хабарламасында. Ворошилов көшесінде қуғындағы көліктегі мас жүргізуші ара қашықтықты сақтамай, «ВАЗ-21099» көлігімен апатқа ұшырады. Аталмыш көлік жол бағанасына соғылды, «Ауди» машинасы жолда аударылып, полиция көлігіне соқтығысқан. Тәртіп бұзушы қолға түсті. Қатты зардап шеккендер жоқ. «Жол-көлік апатының себептері мен жағдайы анықталып жатыр», - делінген хабарламада.