Биыл емдеу мекемелеріне 100-ге жуық дәрігер тартылды. Олардың арасында онкологтар, бала дәрігерлері, терапевт және хирургия саласының мамандары бар. Сонда да, облыс ауруханалары мен емханаларында ақ желеңділер қат. Кадр тапшылығы - денсаулық сақтау саласы басшыларының бас ауруына айналған басты мәселе.
«Облыс ауруханаларына шамамен 400-ге жуық дәрігер жетіспейді. Соның кесірінен туберкулез, ана мен бала өлімі, қан айналу жүйесі, қатерлі ісік аурулар бойынша өңіріміз тәуір көрсеткішке қол жеткізе алмай келеді», - деді облыстық денсаулық сақтау басқармасының басшысы Еркін Дәуітбаев.
Басшының мәліметінше, дәрігерлер тапшылығын жою үшін жүйелі жұмыстар жүргізілуде. Мысалы үшін, жас мамандарды тарту мақсатында Батыс Қазақстанның медициналық университетімен келісім жасалған. Мемлекеттік- жекеменшік әріптестік негізінде Рудный және Затобол кентінде 250 орынға шақталған емхана салу жоспарланған.
Денсаулық сақтау басқармасының басшысы медициналық жабдықтар мәселесіне тоқталды. Облыстық ауруханада ангиограф істен шыққан. Мемлекеттік-жекеменшік әріптестік негізінде құны 430 млн теңге болатын осындай аппарат сатып алу көзделген.