АСТАНА. KAZINFORM — Бүгін футболдан Премьер-лига командалары арасындағы Қазақстан чемпионатының бесінші турында елордалық «Астана» сырт алаңда түркістандық «Тұранмен» тең ойнады.
Елордалық «Астана» биыл бас жүлдеге қол созуды қалайды. Сондықтан әрбір кездесуде жинақы қимыл көрсетіп, үш ұпай олжалауды алдына мақсат етіп отыр.
Бүгінгі кездесуде де елордалық команда алғашқы болып есеп ашты. Ойынның 30-минутында елордалық клубтың хорватиялық шабуылшысы Марин Томасов мергендік танытты. Осылайша 37-жастағы футболшы өзінің биылғы маусымдағы алтыншы голын соқты.
Оған «Тұран» сапынан Хуршидбек Мухторов 84-минутта бір голмен жауап берді.
Кездесу барысында командалар 1:1 есебіне қанағат білдірді.
Бүгін қызылордалық «Қайсар» мен алматылық «Қайрат» 0:0 есебімен тең ойнады.
Бесінші турды «Жеңіс» (Астана) пен «Елімай» (Семей) командалары түйіндейді.
Ал 19 сәуірде «Ұлытау» «Оқжетпеске» 0:1, «Атырау» «Қызылжарға» 1:2 есебімен есе жіберсе, «Тобыл» «Ақтөбені» 3:0, «Ордабасы» «Жетісуды» 1:0 есебімен тізе бүктірген еді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.