ҚПЛ: «Жеңіс» елордада «Қайратқа» есе жіберді

АСТАНА. KAZINFORM - Бүгін футболдан Премьер-лига командалары арасындағы Қазақстан чемпионаты 20-турында «Жеңіс» пен «Қайрат» командалары кездесті.

Алдағы шілде айына белгіленген аталған ойын алматылық клубтың сол уақытта еурокубок ойындарына қатысуына байланысты алдын ала өткізілді.

Биыл «Қайрат» біріншілікті сәтті бастады. Қазір турнир кестесінде бірінші орында келеді. Ал «Жеңістің» жолы болар емес. Жеті турдан кейін бес мәрте тең түсіп, екі жеңілістен кейін оныншы орынды місе тұтып тұр.

Кездесу барысында алматылық клуб сапынан Георги Зариа 26-минуттан пенальтиден мүлт кетпесе, 36-минутта Валерий Громыко есепті үстемелей түсті.

Екінші кезеңнің 46-минутында «Қайрат» қақпашысы Темірлан Анарбеков дөрекілігіне байланысты қызыл қағаз алды. Төреші оны алаңнан қуып, алматылық клуб он ойыншымен қалды.

Ойынның 77-минутында «Жеңіс» сапынан Хунко Мартинес Мигель Анхель есеп айырмасын қысқартты. Дегенмен одан кейін таблодағы есепке өзгеріс енген жоқ.

Осылайша «Қайрат» қарсыласынан 2:1 есебімен басым түсіп, турнир кестесінде жеке-дара көш бастады.

Айта кетсек, бұл матчтан кейін сегізінші тур басталады. Үш ойын 10 мамырға белгіленсе, 11 мамырға үш кездесу белгіленген.