Бұл туралы бүгін ҚР Экономикалық қылмысқа және сыбайлас жемқорлыққа қарсы күрес агенттігінің ресми өкілі (қаржы полициясы) Мұрат Жұманбай мәлім етті.
«ҚР Бас прокуратурасынан келіп түскен Теңізшевройл ЖШС-нің 212,4 миллиард теңгенің мұнайын заңсыз алу фактісіне қатысты қызметінің тексеріс материалдары бойынша агенттікпен биылғы жылғы маусымның 12-інде ҚР Қылмыстық кодексінің 190-шы бабы, яғни аса ірі көлемде табыс табумен ұштасқан заңсыз кәсіпкерлік бойынша қылмыстық іс қозғалды»,- деді М. Жұманбай.
«Тексеріс барысында ТШО ЖШС «Теңіз» мұнай кен орнында белгіленген аумақтан тыс, яғни 5 мың 100 метр тереңдіктен төмен 41 ұңғыманы қазғандығы анықталды»,- деп тоқталды ол.
Атап айтқанда 2002 жылғы қыркүйектің 1-інен биылғы жылғы маусымның 1-і аралығында 10 ұңғымадан тау кен белгісінің аумағынан тыс 3,4 млн. тонна мұнай өндірілген.
«Тергеу шаралары жүргізілуде және өзге ақпарат тергеу мүддесіне байланысты жарияланбайды»,- деді ресми өкіл.