ҚР Сыртқы істер министрі Ташкентте бірқатар екіжақты кездесулер өткізді
22:57, 15 Шілде 2021
ТАШКЕНТ. ҚазАқпарат - Ташкентте өтіп жатқан «Орталық және Оңтүстік Азия: аймақтық өзара байланыс. Сын-қатерлер мен мүмкіндіктер» атты халықаралық конференцияға қатысу шеңберінде Қазақстан Республикасы Премьер-Министрінің орынбасары – Сыртқы істер министрі Мұхтар Тілеуберді бірқатар кездесу өткізді. Бұл туралы ҚазАқпарат СІМ сілтеме жасап хабарлайды.
Келіссөздер барысында тараптар халықаралық күн тәртібіндегі өзекті мәселелерді, екіжақты ынтымақтастықтың перспективалары мен көпжақты құрылымдар шеңберіндегі өзара іс-қимылды талқылады. COVID-19 індетіне қарсы күресте күш-жігерді біріктіруге және Ауғанстандағы жағдайға ерекше назар аударылды.
Сондай-ақ Министр М.Тілеуберді өңірдің сыртқы саяси ведомстволары мен халықаралық ұйымдардың басшылары, ғылыми және сарапшылық топтардың өкілдерімен бірге Орталық Азия Халықаралық институтының ресми ашылу рәсіміне қатысты. Олий Мажлис Сенатының Төрағасы Танзила Нарбаева іс-шараға қатысушыларға Өзбекстан Республикасының Президенті Шавкат Мирзиёевтің жолдауын оқып берді.