АСТАНА. ҚазАқпарат - Португалия құрамасының бас бапкері Роберто Мартинес 2024 жылғы Еуропа чемпионаты іріктеу сатысындағы екі ойынға Сауд Арабиясының «Аль-Наср» командасының 38-жастағы шабуылшысы Криштиану Роналдуды шақырды, деп хабарлайды ҚазАқпарат тілшісі.
Португалиялық футболшылар Лихтенштейн (23 наурыз) және Люксембург (26 наурыз) құрамаларымен шеберлік байқасады. Бас бапкер Роберто Мартинес аталған ойындарға Криштиану Роналдуды шақыруды жөн көрді.
Бұл - бельгиялық маманның Португалия құрамасы бас бапкері қызметіндегі алғашқы ойындары.
Ол 2022 жылғы әлем чемпионатынан кейін қызметінен кеткен Фернанду Сантушты алмастырды. Катарда өткен доп додасында португалиялық футболшылар 1/4 финалда Марокко (0:1) құрамасынан жеңіліп, жарысты ерте аяқтады.
38-жастағы Роналду өз елінің құрамасы сапында 2003 жылдан бері ойын көрсетіп келеді. Ол аталған 196 кезеңде 118 голдың авторы атанып, 43 нәтижелі пас берді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.