Талдықорған қаласында волейболдан әйелдер командалары арасында ҚР кубогі ойындары мәресіне жетті, деп хабарлайды Kazinform.
Бас жүлде үшін соңғы матчта Азамат Есімов жаттықтыратын «Қуаныш» (СҚО) пен «Алматы» командасы (бас бапкері Рафаэль Гилязутдинов) алаңға шықты.
Біршама тартысты өткен матчта «Қуаныш» қарсыласын 3:1 (25:15, 25:8, 26:28, 25:13) есебімен ұтып, ел кубогіне қол жеткізді.
Валерий Шиндов баптайтын талдықорғандық «Жетісу» клубы үздік үштікке ілікті. Олар түркістандық «Тұранды» (бас жаттықтырушы Асқар Шалқыбеков) 3:0 (25:11, 25:23, 25:23) есебімен жеңді.
Биыл командалар сапында елеулі өзгерістер болды. Мысалы, жұлдызды ойыншылар жиналғанына қарамастан, талдықорғандықтар жартылай финалда «Қуанышқа» есе жіберді.
Еске сала кетейік, бұдан бұрын «Павлодар» волейбол клубының ҚР кубогінің иегері атанғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).