«Бүгін 6 мобильді топ мүшелері 100-ге жуық тұрғынға бағалау нәтижелерін таныстырады. Бағалау нәтижесімен танысқан тұрғындар 2 күннен соң өтемақы алу үшін Жылыой ауданының әкімдігіне жүгіне алады», - деп хабарлады Атырау облыстық жедел штабы.
Құлсары қаласының тұрғыны Гүлнұр Ілиясованың айтуынша, үйіне кірген тасқын судың деңгейі терезе жақтауына дейін жеткен.
«Үйіміз тұруға жарамсыз болып қалды. Біз үйдің бір шаршы метріне 240 мың теңге берілсе, оған келісеміз. Бұл қаражат үйімізді бұзып, қайтадан салуға жеткілікті болады», - дейді Гүлнұр Ілиясова.
Су тасқыннан зардап шеккен тағы бір тұрғын Күләш Аманбайқызы мемлекеттің қолдау көрсететініне сенеді.
«Мемлекет тарапынан үйімнің бір шаршы метріне 200 мың - 240 мың теңге көлемінде ұсынылып отырған қаржы жеткілікті деп ойлаймын. Дәл қазіргі мақсатым – үйімді тездетіп салып алу. Маған артық ештеңе қажет емес, ұсынылған өтемақыға ризамын», - дейді Күләш Аманбайқызы.
Қазір Құлсары қаласындағы №20 мектепте үйлері апатты деп танылған тұрғындармен меморандум жасау үшін өтініштер қабылданып жатыр.
«Меморандумға сәйкес тұрғындарға тасқын судан бүлінген үйі үшін өтемақы төлеуге байланысты екі нұқса ұсынылады. Тұрғындар өзіне ыңғайлы нұсқаны таңдауы қажет. Біріншісі – зардап шеккендердің арнайы нысаналы шотына тиісті қаржыны аудару. Бұл қаржы жаңа тұрғын үй сатып алуға, тұрғын үй салуға немесе жөндеу-қалпына келтіру жұмыстарына жұмсалуы керек. Екіншісі – жергілікті атқарушы органның жобалық үлгісі бойынша 3 ай ішінде пайдалануға беру міндеттемесімен үй салу», - деп мәлім етті облыстық жедел штабтан.
Еске сала кетелік, бұған дейін Құлсарыдағы су тасқынынан кейін апатты жағдайда тұрған 756 үй анықталғанын хабарлаған болатынбыз. Сондай-ақ Құлсарыда үйді бағалау қорытындысымен келіскен 6 отбасы өтемақыға өтініш бергенін жазған едік.