Құранды келемеждеген фильмнің көрсетілуіне тыйым салынды

АСТАНА. 27 қаңтар. ҚазАқпарат - Үндістанның Тамил Наду штатының билігі Болливуд түсірген «Вишварупам» атты фильмді тыйым салды. muslim.kz сайтының жазуынша, бұған ислам ұйымдары себеп болды. Мұсылман жетекшілерінің айтуынша, аталмыш фильмде Құранның маңызы жоққа шығарылып, күлкі құралына айналдырылған.

«Бас министр бұл фильмнің штаттағы тыныштық пен тұрақтылықтың іргесін шайқалтып, дүрбелең тудыратынын ескеріп, жоғары лауазымды шенеуніктердің кеңесіне жүгінген», - деді шенеуніктердің бірі Times of India-ға берген сұхбатында.

«Фильмді екі апта бойы көрсетпеу туралы шешім қабылданды», - деді сөзін ары сабақтап.

Үкімет Пайғамбарымыз Мұхаммед Мұстафаның (с.а.с.) туған күніне орай фильмнің көрсетілуіне тыйым салды.

Мұсылмандардың жетекшілері фильм продюсерін бірауыздан айыптады. Сондай-ақ, олар үнді киноматографиясының тарихында мұндай бассыздыққа бұрын-соңды ешкімнің бармағанын тілге тиек етті.

Штаттың қоғам қайраткерлері режиссер Камал Хасанның бұл фильмі мұсылмандар мен индустар ежелден тату тұратын Тамил Надудағы әлеуметтік теңдікке сына қағып, сызат түсіретінін айтып отыр.