ОРАЛ. ҚазАқпарат - Оралда абайсызда атылған оқтан жараланған жасөспірім полиция қызметкерінің ұлы болып шықты. Бұл туралы бүгін өңірлік коммуникациялар қызметінде белгілі болды, деп хабарлайды «ҚазАқпарат» тілшісі.
БҚО ішкі істер департаменті бастығының орынбасары Берік Аймұрзиннің мәлім еткеніндей, зардап шеккен жасөспірімнің әкесі департаментте тылды қамтамасыз ету жөніндегі бөлім бастығы болып жұмыс жасайды.
Оқиға абайсызда орын алған. Қылмыстық іс мылтықты сақтауда салғырттық танытқан үй иесі - ер адамға қатысты қозғалды. Оқиға кезінде үйде балалардың өздері болған. Олар сейфті кілтпен ашып, мылтықты алып, аула ішінде атқан.
Облыстық денсаулық сақтау басқармасынан түскен мәліметке қарағанда, қазір мойнынан жарақат алған бала облыстық клиникалық аурухананың нейрохирургиялық бөлімшесінде жатыр.
Еске салайық, оқиға 21 қаңтар күні болды. Жасөспірімдердің бірі екіншісіне абайсызда оқ атқан.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).