Құрылыс саласындағы нормативтерді реттейтін ұлттық институт құрылады

АСТАНА. KAZINFORM – Құрылыс заңнамасын өрескел бұзған компанияларға құрылыспен айналысуға тыйым салынуы мүмкін. Бұл туралы Өнеркәсіп және құрылыс вице-министрі Қуандық Қажкенов Мәжіліс жанындағы Қоғамдық палатаның отырысында айтты.

- Ұлттық техникалық нормалау институтын айқындау көзделеді. Оның негізгі міндеті азаматтардың қауіпсіздігін және мүліктің сақталуын нығайтуға бағытталған техникалық нормативтік талаптарды әзірлеп, енгізу болады. Ол ұйымға Беларусь пен Ресей Федерациясының тәжірибесі бойынша құрылыс нормалары саласындағы ұлттық институт мәртебесі беріледі деп болжанып отыр, - деді Қуандық Қажкенов.

Оның сөзінше, сала ұйымдарын сертификаттау функциясы бәсекелі ортаға берілуі мүмкін.

- Бұдан басқа, құрылыс саласында өрескел бұзушылықтарға жол берілген жағдайда қызметті жүзеге асыруға тыйым салу мүмкіндігімен құрылыс нарығына қатысушылардың ортақ жауапкершілігін белгілеу жоспарланып жатыр, - деді вице-министр.

Еске салсақ, Kazinform ұзақ уақыт бойы әрі қызу талқыланып келе жатқан Құрылыс кодексі жобасының айналасында қандай сын мен шағым бар екеніне шолу жасаған еді. 

Сондай-ақ елімізде құрылыс кодексі әзірленіп жатқанын жазған болатынбыз.