НҰР-СҰЛТАН. ҚазАқпарат - «Барыс» бүгін Құрлықтық хоккей лигасындағы кезекті ойынын сырт айдында Ресейдің «Динамо» (Мәскеу) командасымен өткізді, деп хабарлайды ҚазАқпарат тілшісі.
Кездесуде ресейлік хоккейшілер тізгінді ойын басынан қолға алды. Нәтижесінде Владислав Ефремов 5-минутта мергендік танытты. Бұдан кейін екі команда тарапынан есепті өзгертетін бірнеше мүмкіндік болған еді. Хоккейшілер көздеген нысанадан мүлт кетті.
Екінші кезеңнің 21-минутында ресейлік Станислав Галиев есеп айырмасын арттыра түсті. Ойынның 55-минутында «Барыс» хоккейшісі есеп айырмасын қысқартқан еді. Дегенмен 59-минутта ресейлік Михаил Фисенко қорытынды есепті белгіледі.
Осылайша «Барыс» қарсыласына 1:3 есебімен жол берді.
Еске салсақ, елордалық клуб бұдан бұрынғы бес кездесудің төртеуінде «Динамо» командасына есе жіберіп қойды.
Енді «Барыс» 3 қазанда Ресейде «Локомотив» (Ярославль) командасымен кездеседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.