Құтқарушылар өртенген үйдің әрбір пәтерін тексеріп жатыр
АСТАНА. KAZINFORM — Астанада көпқабатты тұрғын үйден шыққан өртпен күрес әлі жүріп жатыр. Бұл туралы Төтенше жағдайлар министрлігінің ресми өкілі Динара Нұрғалиева мәлім етті.
«Тілсіз жаумен күреске 80-ге жуық маман және 17 техника жұмылдырылды. Өрт болған аумақта арнайы штаб құрылды, қазір көпқабатты тұрғын үйдегі әрбір пәтер тексеріліп жатыр. Дәл қазіргі ақпарат бойынша зардап шеккендер жоқ», — деді Динара Нұрғалиева оқиға орнында БАҚ өкілдерінің сауалына жауап беріп.
Дегенмен оқиға орнында жедел жәрдем қызметкерлері көмекке дайын тұр.
Оның айтуынша, ғимарат 27 қабаттан тұрады, оның ішінде 26 қабаты — тұрғын үй.
«Көпқабатты тұрғын үйдің 180 шаршы метрін жалын шарпыды. Тұрғындар уақтылы эвакуацияланды, нақты айтқанда ТЖМ мамандарының көмегімен 8 адам құтқарылды, оның ішінде 2 бала бар», — дейді ол.
Бұған дейін агенттік тілшісі оқиға орнынан фоторепортаж жасаған еді.
Еске сала кетейік, бүгін астанада көпқабатты үйдің 26-қабатынан өрт шықты.
Құтқарушылар 8 адамды қауіпсіз жерге шығарды. Арнайы штаб құрылды.
Оқиға орнында Төтенше жағдай министрі Шыңғыс Әрінов жүр.