Қырғызстан өкілі Мұратбек Иманәлиев - ШЫҰ-ның жаңа Бас хатшысы

БЕЙЖІҢ.    Желтоқсанның   24-і.  ҚазАқпарат /Руслан  Сүлейменов/ -   2010   жылғы қаңтардың  1-інен бастап Шанхай ынтымақтастығы    ұйымының    Бас хатшысы    лауазымына     Қырғызстан   өкілі Мұратбек  Иманәлиев    кіріседі.  Ол   бұл қызметте   Қазақстан  өкілі Болат  Нұрғалиевті ауыстырады.

«Ротация  бойынша   Ұйымның  жаңа  басшысының кандидатурасын    ұсыну   Қырғызстан   тарабының кезегі болады,    олар өз  өкілін  ұсынды.   Жаңа    Бас хатшы  бұрын  Қырғызстанның  сыртқы істер  министрі  болған  азамат»,  деп  хабарлады  Б.Нұрғалиев.

ШЫҰ Бас хатшысын     ШЫҰ  елдері  Мемлекет басшыларының  кеңесі  үш жыл мерзімге тағайындайды.

Мұратбек  Иманәлиев   1991-1992 жылдары, 1997-2002 жылдары     Қырғыз Республикасының сыртқы  істер   министрі  болған,  1993-1996 жылдары    Қырғызстанның Қытайдағы елшісі  қызметін  атқарған,  1996-1997  жылдары - Қырғыз Республикасы  Президент Әкімшілігінің    халықаралық  бөлімінің меңгерушісі,  2004   жылы   «Жаңа бағыт»    қозғалысының  тең  құрылтайшысы  болып  қызмет еткен.   2005 жылы    Қоғамдық саясат институтының  президенті болып сайланған.  Ал  2009 жылдың қаңтар-қазан  айларының аралығында Қырғыз  Республикасы  Президентінің  кеңесшісі  болып қызмет етті.