ОРАЛ. 20 қаңтар. ҚазАқпарат /Елжан Ералы/ - Алдағы 7-Қысқы Азия ойындарында ел намысын алты бірдей батысқазақстандық шорт-трекші қорғайды.
Ел құрамасының бас бапкері, Қазақстанның еңбек сіңірген жаттықтырушысы Мәдіғали Қарсыбековтің айтуынша, жігіттерден Бейжің олимпиадасына қатысқан Айдар Бекжанов, сондай-ақ Артур Сұлтанғалиев, Нұрберген Жұмағазиев, Абзал Әжіғалиев, қыздардан Инна Симонова мен Ксения Мотова айдынға шығады. Қазір шорт-трекшілер Астанада жаттығуда. Спорттың бұл түрінен жарыс 31 қаңтар күні басталмақшы.
Батыс Қазақстан облыстық туризм, дене шынықтыру және спорт басқармасының бастығы Мүсілім Оңдағановтың сөзіне қарағанда, Оралдың «Ақжайық» командасынан жасақталған Қазақстанның допты хоккей құрамасы алтын медальға қол созса, шорт-трекшілер мен мәнерлеп сырғанаушылар Виктор Адоньев пен Виктория Кучеренко (бапкерлері - Ресейдің еңбек сіңірген жаттықтырушысы Светлана Алексеева мен Қазақстанның еңбек сіңірген жаттықтырушысы М.Оңдағанов) Азиадада қола жүлдеге қол жеткізеді деген үміт бар.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).