Қытай шетелдік студенттерді достық елшісі болуға шақырады
08:53, 01 Қазан 2010
БЕЙЖІҢ. Қазанның 1-і. ҚазАқпарат /Руслан Сүлейменов/ - Қытай Халық Республикасының басшылығы шетелдік студенттерді Қытай және әлем елдері арасындағы достық елшісі болуға шақырады. Бұл туралы Бейжіңде шетел студенттері үшін ҚХР есіктері ашылған 60 жылдық атаулы күнге арналып өткізілген іс-шара барысында ҚХР Мемлекеттік кеңесінің мүшесі Лю Яньдун мәлім етті.
Ол ҚХР-дың білім беруі қалыптасқаннан бергі 60 жыл ішінде ел 190 мемлекет пен аймақтардың 1,69 млн. студентін қабылдағанын атап өтті. Қазіргі таңда Қытайда 240 000 өзге жұрттың жастары білім алып жатыр.
Жоғары лауазымды шенеунік Қытайда білім алып жатқан студенттерді Қытай мен әлемнің басқа елдері арасындағы достық елшісі болуға шақырды.
Қазір Қытайда 3 500-ден астам қазақ студенті оқып жатыр. 2005 жылдан бері «Болашақ» бағдарламасы бойынша 157 студент Қытай Халық Республикасына біліп алуға жіберілген.