Қытайдың Хайнань аралынан қазақстандық туристерді қайтару проблемасы шешілді - СІМ
18:06, 24 Қаңтар 2011
АСТАНА. 24 қаңтар. ҚазАқпарат /Марлан Жиембай/ - Қытайдың Хайнань аралынан қазақстандық туристерді қайтару проблемасы шешілді. Бұл туралы бүгін елордада өткен баспасөз мәслихаты барысында БАҚ өкілдерінің сауалына жауап берген ҚР Сыртқы істер министрлігінің ресми өкілі Асқар Әбдірахманов айтты.
Естеріңізге сала кетейік, өткен аптада еліміздің бірқатар бұқаралық ақпарат құралдары демалысты ұйымдастырған екі туристік фирма арасындағы қаржылық дау-дамайға байланысты республикамыздың 100-ден астам азаматының Қытайдың Хайнань аралынан Қазақстанға орала алмай отырғанын жазған болатын.
«Олардың басым бөлігі 22 қаңтарда туристік компаниялардың бірі ұйымдастырған арнайы авиарейспен елге оралды. Ал қалған бөлігі өз міндеттемелерін орындаған компаниялардың немесе өз қаражаттары есебінен қайтып келді», - деді ресми өкіл.
Дегенмен А.Әбдірахмановтың айтуына қарағанда, демалысын одан әрі жалғастыруды қалаған еліміздің екі азаматы аралда қалып отыр. Олардың визалары 31 қаңтарға дейін жарамды.