Қызметкері толтырған хаттаманы жыртқан полиция бастығы жұмыстан кетті
Бұл туралы Өңірлік коммуникациялар қызметінде өткен брифингте Атырау облыстық ІІД жергілікті полиция қызметі басшысының орынбасары Әлібек Қайыров мәлім етті, деп хабарлайды «ҚазАқпарат» ХАА тілшісі.
«Қазіргі уақытта аталмыш факті бойынша сотқа дейінгі тергеп-тексеру жүргізілуде. Қабылданатын жазалау шарасы соның нәтижесі бойынша белгілі болады», - деді Ә.Қайыров.
Бұған дейін хабарланғандай, Махамбет ауданында Н.Досқайыровтың қатысуымен болған оқиғаның видеосы 2016 жылдың желтоқсан айында әлеуметтік желілерге орналастырылды. Бейнежазба үлкен қоғамдық резонанс тудырды. Полицейлер нөмірсіз кетіп бара жатқан тракторды тоқтатып, хаттама толтырған. Тракторшы телефон арқылы көмекке аудан әкімінің орынбасарын, ал ол өз кезегінде, полиция қызметінің бастығын шақырады. Оқиға орнына жеткен Досқайыров қол астындағы қызметкерлері толтырған хаттаманы жыртып, оларды әдептен тыс сөздермен балағаттаған.